आता बिझनेस कोच आणि मोटिव्हेशनल बिझनेस स्पीकर्स यांना थांबवण्याची वेळ आली आहे, कारण ते तरुण पिढीला चुकीच्या मार्गाने घेऊन जात आहेत. हे लोक तरुणांना पटवून देतात की नोकरी म्हणजे गुलामी आणि व्यवसाय म्हणजे राजा होणं. व्यवसाय म्हणजे प्रचंड पैसा, श्रीमंती, आणि तुम्ही स्वतःचे मालक असता, अशी धारणा ही मंडळी निर्माण करत आहेत. हे सगळं ते का करतात? कारण त्यांना रील्स आणि व्हिडीओ व्हायरल करून त्यातून चांगले उत्पन्न कमवायचे असते. ते फक्त तरुणांच्या भावना खेळवतात आणि व्यवसायाचे स्वप्न विकतात, पण संपूर्ण चित्र कधीच दाखवत नाहीत.
नोकरी म्हणजे फक्त गरज पूर्ण करण्यासाठी असते, ती गुलामी आहे आणि व्यवसाय तुम्हाला स्वप्नपूर्ती आणि ऐश्वर्य देतो, असा एक भ्रम त्यांनी निर्माण केला आहे. आणि आजच्या तरुण पिढीला हा भ्रम खूप आवडतो. मागचा-पुढचा विचार न करता, कर्ज काढून किंवा घरची सगळी बचत घेवून व्यवसायात उडी घेतली जाते.
मात्र, कुठला व्यवसाय करावा, पहिली पायरी काय असावी, आणि भविष्यात तो व्यवसाय वाढवण्यासाठी काय करायला लागेल याबद्दल कोणीही विचार करत नाही, ना ते बिझनेस कोच किंवा मोटिव्हेशनल स्पीकर्स सांगतात.
तुम्ही आज पाहू शकता की गावात, शहरात, चौकात कितीतरी व्यवसाय सुरु होतात आणि लगेच बंद होतात. एखादा व्यवसाय मोठ्या धडाक्यात सुरु होतो, पण तो वर्षभरात बंद पडतो. हे सगळं का होतं? कारण व्यवसाय चालवण्यापूर्वी त्याबद्दल योग्य अभ्यास केला जात नाही. एकाने चहाचं दुकान सुरु केलं की दुसराही तेच करतो, एकाने कपड्याचं दुकान टाकलं की दुसराही त्याच मार्गावर. हेच मोबाईल शॉप्स, स्नॅक्स सेंटर इत्यादी बाबतही लागू होतं. आजकाल रील्समध्ये काहीतरी व्हायरल झालं की लोक लगेच त्याचं अनुकरण करायला लागतात.
फ्रँचायझी मॉडेल्सही आजकाल खूप लोकप्रिय झाले आहेत. काही लोकं मोठ्या रकमा घेऊन फ्रँचायझी देतात, पण व्यवसाय यशस्वी होईल याची शाश्वती मात्र देत नाहीत.
आजच्या तरुणांनी नोकरी मिळाली नाही म्हणून किंवा हवी ती नोकरी न मिळाल्यामुळे व्यवसाय सुरु करण्याचा हा प्रवाह बदलायला हवा. नोकरी जमली नाही की लगेच एखादं दुकान उघडावं असा आजचा ट्रेंड आहे. मात्र, व्यवसाय सुरु करण्याआधी त्याच्याबद्दल योग्य माहिती मिळवणं खूप आवश्यक आहे. व्यवसाय सुरु करण्यासाठी किमान १००० दिवस मेहनत द्यावी लागते. यश मिळेपर्यंत कोणत्याही प्रकारचे काम करावे लागेल, पण आजच्या तरुणांना लगेच बॉस व्हायचं असतं.नोकरी आणि व्यवसाय या दोन्ही गोष्टींचं आपलं महत्त्व आहे. कोणतीही गोष्ट कमीपणाची नाही.
हे सगळे मुद्दे लक्षात घेऊन, तुम्ही योग्य प्रकारे व्यवसाय सुरु करू शकता. फक्त बिझनेस कोच, मोटिव्हेशनल स्पीकर्स, किंवा युट्युब व्हिडीओ पाहून व्यवसाय सुरु करू नका. मित्र, शेजारी किंवा नातलगाने व्यवसाय सुरु केला म्हणून तुम्हीही तेच करायला नका उतरू. १००% तयारीने व्यवसायात उडी घ्या आणि कोणतीही अडचण आली तरी ती पार करण्याची जिद्द ठेवा.
आजूबाजूला अनेक लोकं चुकीच्या माहितीवर व्यवसायात उतरतात आणि कर्जाच्या ओझ्याखाली दबलेले असतात. अशी अनेक उदाहरणं तुम्हाला सापडतील, पण त्यावर कोणीच रील्स किंवा व्हिडीओ बनवत नाही. फक्त फायद्याचं गणित दाखवतात, पण कर्ज, भांडवल, आणि मनुष्यबळ याबद्दल चर्चा होत नाही. हे सगळं ते बिझनेस कोच आणि मोटिव्हेशनल स्पीकर्स त्यांच्या फायद्यासाठी करतात.
मी असं म्हणत नाही की फक्त नोकरीच करा आणि व्यवसाय करू नका, पण व्यवसाय करताना पूर्ण माहिती आणि तयारीने करा. चुकीच्या माहितीला बळी पडू नका. जागरूक राहा, सर्व माहिती मिळवा, आणि मगच मोठे निर्णय घ्या.
🌧️ पुढचे 3 दिवस धोक्याचे! महाराष्ट्रात मान्सूनचा कहर, तुमचा जिल्हा अलर्टवर आहे का? गेल्या काही दिवसांपासून महाराष्ट्रात मान्सूनचा जोर लक्षणीयरीत्या वाढला असून, हवामान खात्याने पुढील चार दिवसांसाठी मुसळधार पावसाचा अलर्ट जाहीर केला आहे. मुंबई, पुणे, अधिक वाचा…
इंग्लिश मीडियम शाळांमधून शिक्षण म्हणजे खर्च का? आणि मराठी मीडियममधून शिक्षण हेच का आहे खरे इन्व्हेस्टमेंट? आजच्या युगात पालक इंग्रजी मीडियम शाळांकडे झुकतात. “इंग्रजी येणं म्हणजे यश” – या चुकीच्या समजुतीवर आधारित एक मानसिकता समाजात अधिक वाचा…
डिजिपिन म्हणजे काय? आणि पारंपरिक पिनकोडच्या तुलनेत याचं स्थान काय आहे? 📌 “तुमचं पत्र किंवा पार्सल योग्य पत्त्यावर पोहचवण्यासाठी आता फक्त पिनकोड नाही, तर डिजिपिनसुद्धा महत्त्वाचं ठरणार आहे!” 🧭 डिजिपिन म्हणजे काय? डिजिपिन हा भारतीय अधिक वाचा…
